Налутениот Новак Ѓоковиќ помина доста време од финалето на Мастерсот во Рим во неделата во расправија со судијата. Светскиот број 1 загуби со 6:3/6:3 од Енди Мареј во меч во кој врнеше од почетокот до крајот, но не беше прекинат.
Кога Мареј беше на само два гема од победа, Ѓоковиќ почна да зборува со судијата на столче Дамијан Штајнер, велејќи му „не сакам да играм повеќе“. Претходно во вториот сет, Ѓоковиќ го фрли рекетот, меѓутоа Штајнер остана неубеден и дозволи мечот да се комплетира.
По ова следуваа коментарите дека Ѓоковиќ не знае како да губи. Дали тој беше вознемирен од лошата игра против Шкотланѓанецот, кого претходно го имаше победено 12 пати во 13 меча, но Србинот потоа посочи дека поразот немал врска во коментарите.
„Можеме да се смееме за тоа сега, но не е смешна работа. Не се работеше за тоа кој игра подобро, кој ќе победи или кој ќе загуби. Најважно е да останеш здрав. Условите не беа најдобри за игра и ризикот за повреда беше многу поголем отколку што треба. Посебно зад основната линија, каде што се движиме најмногу“, изјави Ѓоковиќ.
Тој, сепак, призна дека на моменти бил премногу емотивен.
„Вакви мечеви се важни за секого. Кога играш со голем ривал, нормално е да сакаш да победиш и да станеш емотивен. Фрлив рекет и добив предупредување. Судијата беше ’жежок’. Сакаше да го покаже авторитетот и го направи тоа“, вели Ѓоковиќ.