Канадскиот тениски турнир „Роџерс куп“ оваа година ќе биде ослабен со неиграњето на дел од моментално најголемите светски тениски ѕвезди. Швајцарецот Роџер Федерер и Шпанецот Рафаел Надал го откажаа учеството на тенискиот турнир во Торонто кој треба да се одржи идната седмица. Решенитето на двајцата доаѓа само неколку дена откако светскиот рекет број 2 и овогодишен победник на Вимблдон, Енди Мареј, реши да се повлече од „Роџерс куп“ и да земе одмор пред одбраната на титулата на Олимписките игри во Рио во август. Третопласираниот на АТП листата, Федерер, и шампион во Торонто во 2004 и 2006 година соопшти дека му е потребна пауза по пласманот до полуфиналето на Вимблдон пред еден месец.
„Гледајќи напред, за мене најдобро е да се одморам по настапот на Вимблдон. Оваа година нема да играм во Торонто, но ќе се вратам на овој турнир идната година“, изјави 34-годишниот Федерер, кој во Рио ќе го брка третиот олимписки медал.
Тенисерот број 4 во светот Надал нема настапи од јуни откако се повлече по второто коло на Ролан Гарос поради повреда на раката.
„Пред една седмица почнав со нормални тренинзи по повредата на раката и сè уште не сум подготвен да заиграм на голем турнир, каков што е Роџерс купот“, објави Надал, кој е трикратен шампион во Торонто.
Па така во Торонто ќе учествува само лидерот на светската ранкинг листа Новак Ѓоковиќ, кој ќе го брка четвртиот трофеј на овој турнир.