Ракометарите на Вардар, во средата ги активираа моторите за новата сезона. По неколку дена базични подготовки во Скопје, екипата в понеделник ќе замине во Крањска Гора, каде што ќе престојува до 12 август. Во тој период ќе се одиграат две пријателски средби со Горење.
Сосема очекувано, нозете во почетниот период се тешки, и како што одминува времето, ќе доаѓа до напредок.
Откако вториот дел од сезоната истовремено го мина како консултант тренер кај девојките и асистент кај мажите, Давид Дејвис Камара од оваа сезона ќе се врати на првичната своја цел. Тоа е улогата на асистент на Гонзалез во машкиот тим.
„Се надевам дека ќе имаме добра сезона, без многу повреди. Пред секој нов почеток на натпреварувачката година јас се чувствувам одлично, па така и сега возбудата не изостанува. Новите играчи се одлични, тука е Кањелас кој дојде од Кил, и имаше одлични мечеви минатата сезона. За Лигата на шампионите и овој пат имаме високи очекувања. Сите викаат дека другата група е полесна, но, тоа не е точно. Кај нас се наоѓа Рајн Некар Левен кој важи за најдобар тим во Германија. Тука е и освојувачот на ЛШ, Киелце. Секој натпревар е тежок тука, без разлика дали играш дома или на гости. Секоја сезона, месец и натпревар е поинаков“ изјави Давид Дејвис.
ВО ВАРДАР ИМА МЕСТО САМО НАЈДОБРИТЕ
Со ангажирањето на Жоан Кањелас, шпанската колонија кај македонскиот шампион брои сега четири ракометари. Доколку го вклучиме и тренерскиот двоец Гонзалез - Давид Дејвис, таа ќе брои шест. Покрај Кањелас, тука се и Арпад Штербик, Хорхе Македа и Алекс Душебаев, кој на крајот на сезоната ќе замине во Киелце.
„Би било добро доколку ја донесеме целата шпанска репрезентација во Вардар“ низ смеа вели Камара.
„Целта на Вардар е во клубот да играат само најдобрите. Без разлика дали тоа се Шпанци, Македонци или Французи. Не е важно од каде се, важно е само да станува збор за квалитетен играч“ заврши Давид Дејвис.
Со враќањето на улогата асистент во машкиот тим, значи дека раководните луѓе во Вардар ќе мораат да побараат нов помошник на Индира Кастратовиќ. Пред Давид Дејвис, оваа работа им беше доделена на Јан Питлик и Ким Расмусен, кои од тимот си заминаа поради најразлични причини.