МАКЕДОНИЈА – ФАРСКИ ОСТРОВИ
Петок, 21:00ч.
Сала „Холин А Халси“ во Торшавн, Фарски О. Судии: Борис Мандак и Марио Рудински од Словачка. Делегат: Балаш Сос од Унгарија.
Циклусот квалификации за Светското првенство 2017 во Германија за женската репрезентација на Македонија почнува вечерва (21 часот) во Торшавн, против Фарски Острови, организаторот на турнирот во групата три. По целодневното патешествие од 13 часа, селекторот Симе Симовски и неговите избранички ќе се обидат да стават крај на „црната“ серија која трае од јуни 2012 и по четири години да дојдат до победа на еден официјален натпревар. Противникот е непознат, па поради тоа мора Македонија да игра внимателно и да ја користи секоја шанса за триумф.
„Фарски Острови е непознат противник за нас. Имаат 5-6 репрезентативки кои настапуваат во данското првенство, но каков квалитет е селекцијата не знаеме. Затоа мора да бидеме внимателни и подготвени на сè. Нема да биде лесно, веќе сите знаат да играат ракомет, но она што е најважно за нас е да играме без осцилации. Имаме добра бековска линија и со помалку технички грешки ќе се обидеме да дојдеме до победа. Работевме многу, се подготвувавме и за новата тактика ’7 на 6’, како и на 3-2-1 во одбрана која би можеле да ја играат Фарски Острови, но ќе видиме како ќе треба да се поставиме според случувањата на теренот“, вели селекторот Симе Симовски.
Во групата три за противници ги имаме и Австрија и Исланд, кои се среќаваат во првиот меч денеска.