Доста новитети однесе Лино Червар на Маврово. Најголемиот дел од нив се метални и тежат многу килограми, а служат за „физика“.
Најголемиот, односно највпечатливиот момент е, сепак, обидот да се формира непробојна одбрана. Буквално.
Маркер-елеците за играчите во зоната се заменети со малку поинакви елеци. Новите елеци за играчите во дефанзивната зона се тешки десетина килограми и нивната основна функција е да запираат куршуми. Со панцирни елеци какви што користат специјалните воено-полициски сили тренираат одбранбените играчи во зоната 3:2:1.
„Мораме да бидеме силни и мораме да бидеме брзи. Елеците засега вршат добра работа, но ќе видиме дали ќе завршат работа“, изјави Лино Червар.
Македонија на СП ќе промени некои работи во начинот на кој игра. Од најстариот и најбавен тим треба да се претвориме во екипа која меѓу првите се трансформирала во тим што игра модерен ракомет, стокмен по најновите правила.