Најдобриот македонски шаховски колектив, „Алкалоид“ утре ќе организира турнир во брзопотезен шах „Алкалоид 2017“. Во хотелот „Континентал“, каде што ќе се одржува ова натпреварување, пријавени се рекорден број натпреварувачи. Таа бројка изнесува над 170 шахисти кои доаѓаат од шест држави. Наградниот фонд, пак, изнесува 122 илјади денари.
Прв носител на ова натпреварување ќе биде велемајсторот од Бугарија, Кирил Колев. Додека, пак, најголем македонски „адут“ ќе биде Филип Панчевски, кој впрочем е и актуелен бранител на титулата.
Покрај Панчевски, настап на „Алкалоид 2017“ ќе забележат и Влатко Богдановски, Звонко Станојоски и Драгољуб Јакимовиќ, а меѓу нив ќе бидат и нашите најмладите репрезентативци, ФИДЕ мајсторите Никола Николовски и Тони Лазов.
Ќе се играат девет кола по швајцарски систем, додека победникот ќе добие награда од 25 илјади денари плус пехар.
Македонскиот клуб повторно покажа грижа за овој спорт кај нас и со право го оправдува епитетот најдобар во Европа. Како што е познато, „фармацевтите“ во ноември ја освоија титулата на Европскиот Клупски Куп кој се одржа во ноември минатата година. Почетокот на турнирот е најавен за 10, наградите, пак, ќе бидат поделени по 19:30 часот.