Капитенот на македонската репрезентација, Кире Лазаров постигна 11 гола на дуелот против Исланд, по кој се искачивме на првото место на табелата во нашата група.
- Јас сум презадоволен само поради победата. Исланд е квалитетна репрезентација со многу добри индивидуалци. По долги години можам да кажам дека скоро 50 минути одигравме на максимално, највисоко ниво, со една голема ментална сила и тоа ми дава надеж за оваа репрезентација. Ми се допаѓа што и младите играчи кои што беа доста искритикувани проработеа и очигледно дека критиката им беше добредојдена. Многу ни помогнаа нам искусните и делувавме како колектив. Среќен сум поради оваа победа, не толку поради победата, туку поради како што кажав за кревање на самодовербата. Ја пребродивме кризата како колектив и тоа дава надеж дека ќе играме подобро, а со подобра игра стигнуваат и победите. Сега е неблагодарно да се каже дека се чувствува некоја нова искра. Сите што ја воделе репрезентацијата сме ги почитувале, ние сме тука да го даваме максимумот.
Секој тренер е различен, најважно е да победуваме. Се надевам дека допринесовме за мала радост на нашата нација. Во Исланд ќе одиме растеретени, ќе одиме да се надигруваме и најважно ќе биде да настапиме во добро светло. Голем чекор е ова за нашиот пласман на ЕП. Уживавме сите, уживаа младите и сега во Исланд ќе одиме да уживаме, изјави Кире Лазаров.