Најдоброрангираниот македонски тенисер, Томислав Јотовски, вчера приреди ретко виден подвиг, кога за само три часа, од 9 часот наутро до пладне, елиминираше двајца противници на ИТФ-турнирот од фјучрс серијата во Телави, Грузија. После двата триумфа на кои беше во негатива, тој се пласираше во полуфиналето на овој турнир, кој се игра за награден фонд од 15.000 долари.
Во осминафиналето, рускиот тенисер Лозан, кој играше финале на претходниот турнир во Телави, имаше предност од 6:1 и 5:3, но македонскиот тенисер се надмина себеси и направи пресврт откако најпрвин израмни на 1:1 во сетови, со победа во тај-брејк, а потоа психолошки паднатиот Лозан беше декласиран со 6:1 во третиот сет.
Томи немаше многу време за радост и по куса пауза, мораше повторно да излезе на теренот, овој пат против Цивадзе од Грузија. Ривалот почна подобро, поведе со 6:4, но немаше сили да издржи во истото темпо, Јотовски се разигра и на двапати со по 6:2 ги доби следните сетови за место меѓу четворицата најдобри. Ривал во денешното полуфинале ќе му биде Федерико Себаљос од Боливија, кој е втор носител на турнирот.