Европскиот првак Вардар одлучи порано да ги пушти во продажба билетите за новата сезона. И покрај тоа што црвено-црниот тим лани имаше незаборавна сезона, во која освои сѐ што можеше да се освои, сепак, одлучи да не ја менува цената на билетите. Приоритетната продажба почнува на 24 јули и ќе трае до 6 август, потоа останатите билети ќе бидат пуштени во регуларна продажба, која ќе почне на 7 август и ќе трае до 20 август.
„Сакајќи да им излезе во пресрет на своите навивачи и да има доволно време секој да си обезбеди билет за натпреварот на кој сака да го гледа европскиот првак Вардар, решивме да ги пуштиме во продажба сезонските билети. Цената на сезонските билети е иста како и ланската сезона.
Сите оние што ланската сезона имале сезонски билети за натпреварите на РК Вардар и на ФК Вардар, сега ќе имаат приоритет во купувањето билети. Тие ќе можат да ги заменат старите сезонски билети со нови, само за местата што досега ги имале, и тоа за време на приоритетната продажба. За секој поединечен натпревар ќе бидат пуштени билети во продажба само доколку има слободни места. Со секој купен сезонски билет, ќе може да се добие и шампионска маица по цена од 399 денари“, се вели во соопштението на РК Вардар.