Македонската ракометна репрезентација го доживеа првиот пораз на Европското првенство, откако вечерва во Вараждин загуби убедливо од Шпанија со 31:20, полувреме 15:6.
Целата концепција на селекторот Раул Гонзалес како да се сруши по повредата на капитенот Кирил Лазаров кој по само 12 минути го напушти теренот поради повреда на десната ложа.
„Црвено-жолтите“ играа дезориентирано, нападот тешко одеше според планираното, противникот лесно доаѓаше во поволни позиции и само фатените зицери на голманите Борко Ристовски и Никола Митревски спречија поголема катастрофа.
Шпанија одлично го отвори натпреварот со 3:0 по само шест минути игра, а веќе во 10. минута беше 6:1. Дури на половина од првиот дел Македонија преку Дејан Манасков го постигна првиот гол од игра за во тој момент да намали на 3:7. Двете селекции во наредните неколку минути постигнаа по два гола за 5:9, а потоа до паузата следуваше серија од шест последователни гола на „црвената фурија“ за плус 10 (15:5).
Откако беше јасен победникот, македонскиот селектор во второто полувреме поголема минутажа им даде на помладите кои на моменти покажаа дека можат достојно да ги заменат поискусните Лазаров, Миркуловски, Георгиевски,....
И покрај поразот, шансите за полуфинале постојат. На Македонија во втората фаза и остануваат уште две средби, со Чешка и против Данска. Со евентуални четири бода Македонија ќе биде во игра за пласман на завршницата од евро-шампионатот.
На ваков епилогот се надеваат и неколкуте илјади навивачи кои беа присутни во „Арена Вараждин“ и повторно и дадоа поддршка на македонската селекција. На трибините беше и премиерот Зоран Заев во друштво со директорот на Агенцијата за млади и спорт Дарко Каевски.
Следниот дуел „црвено-жолтите“ го имаат в среда од 20:30 часот со Чешка.
Табела група 2: Данска 6 бода (натпревар повеќе), Шпанија 4, Германија 4 (натпревар повеќе), Македонија 3, Чешка 2, Словенија 1.