Енди Мареј го совлада Шпанецот Томи Робредо во финалето на Шенжен опен во Кина за прв трофеј по освојувањето на Вимблдон во 2013 година.
27-годишниот Шкотланѓанец по ова призна дека поминал „многу тешка“ недела со поддршка на неговата девојка Ким Сирс, откако беше во „мешаница“ по поддршката за шкотскиот референдум за независност. Тешката недела тој ја заврши со спасување на пет меч поени при 5:7/7:6(9)/6:1 победата над шпанскиот ветеран.
„Денеска имав многу тежок меч, условите беа тешки за играње со жештината и влажниот воздух. Имав среќа на крајот на вториот сет и, за среќа, успеав да направам пресврт“, вели Мареј.
Во тај-брејкот од вториот сет Мареј спаси четири меч поени во низа, и уште еден на 7:6, за да стигне до 11:9 победа.
„Томи имаше одличен турнир и, најверојатно, заслужуваше да победи. Понекогаш се случува и тоа во спортот. Им благодарам на сите за поддршката“, додаде Британецот.
Со победата Мареј е на 10. место на АТП трката за пласман на АТП финалето во Лондон во ноември, завршниот турнир на кој играат најдобрите осум. 27-годишниот Мареј има 105 поени помалку од осмопласираниот Томаш Бердих и сега продолжува во Кина со турнирите во Пекинг и Шангај.