Веспрем, 27 март 2015 (МИА) – Ракометарите на Вардар не успеаја да се изборат за уште едно финале во СЕХА лигата откако вечерва во полуфиналето на завршниот турнир во Веспрем загубија од Мешков Брест со 32:27 (16:11). Ова воедно беше реванш на белоруската екипа за ланскиот пораз од Вардар во финалето во Нови Сад.
Во првите минути од натпреварот Вардар имаше минимална предност, а екипата на Мешков Брест со две серии од 4:0 и 5:1 на полувремето имаше предност од пет голови разлика (16:11). Во вториот дел Мешков Брест ја одржуваше предност, а Вардар во 50.минута успеа да намали на два негатива (25:23), но немаше сили за пресврт. Со 9 голови Растко Стојковиќ (Мешков Брест) беше најефикасен на натпреварот, кај Вардар Немања Прибак и Алем Тоскиќ постигнаа по 5 голови.
Вардар на овој натпревар играше без повредените Тимур Дибиров, Матјаж Брумен и Илија Абутовиќ (останаа во Скопје), додека тренерот Раул Гонзалес на клупата го остави и голманот Арпад Штербик, додека Игор Карачиќ играше само во вториот дел.
За Мешков Брест ова е второ финале по ред во СЕХА лигата, а Вардар во своето четврто учество на завршните турнири за првпат остана без финале.
Во второто полуфинале вечерва играат Веспрем и Загреб, а „црвено-црните“ во недела во натпреварот за 3.место ќе играат со поразениот од второто полуфинале.