Поранешниот селектор на македонската кошаркарска репрезентација, Александар Џикиќ, изјави дека е мошне шокиран од брзата одлука на МКФ за негово отпуштање. Тој не знае зошто добил отказ, иако во соопштението стои дека се здобил со отказ поради нарушен однос и загубена доверба во органите на федерацијата.
- Добив краток мејл и тоа откако македонските медиуми веќе ја објавија информацијата која стоеше на официјалната страна на федерацијата, изјавил Џикиќ за српски портал.
Тој е целосно разочаран од оваа одлука, како и поради тоа што нема да го бодри националниот тим на ЕП оваа година.
- Во шок сум, првиот тренинг беше закажан за во сабота, а закажани беа и сите контролни натпревари. Знаете што значи за секој тренер настапот на ЕП, едноставно одземено ми е правото на тоа со едно празно и кратко објаснување, истакнал Џикиќ.
Исто така, тој кажал дека по ова не смета дека треба да продолжи со работа во националниот тим.
МКФ веднаш избраа нов селектор на кошаркарската репрезентација, а тоа е Марјан Србиноски, кој му беше асистент на Докузовски во Литванија.