Нема време за одмор, а и не треба да има, за нашите најдобри кошаркари, ако се знае дека за десетина дена ги чека стартот на квалификациите за пласман на ЕП 2017 година.
По скопскиот „Трофеј Македонија“ каде имаа скор од една победа и два порази, „црвено-жолтите“ се преселија во Словенија. Поточно во Марибор каде денеска и утревечер, ќе ги одмерат силите со најдобрата селекција на Словенија.
„Добра можност, веројатно и најдобра за сите нас да видиме што и колку можеме во оваа последна недела од подготовките“ - вели Александар Костоски.
„Мислам дека досега прикажавме добри изданија. Останува жал што не го освоивме Трофејот каде игравме добро. И на нашиот план е да бидеме уште подобри. Тоа ќе ни го овозможат и овие две проверки, против можеби и најсилната селекција со која ќе спарингуваме ова лето, каква несомнено е словенечката“- дополнува нашиот организатор на играта.
Според договорот, првиот од двата меча во салата „Табор“ во Марибор, ќе биде од затворен тип. Вториот пак е предвиден за среда навечер, од 20 часот, а ќе го пренесува и ТВ Словенија.
Инаку, овој викенд, Словенците се „контролираа“ со селекцијата на Велика Британија, наш противник во квалификациите. И победија со 92:80 во меч во кој поентерски кај Британците се издвоија Ден Кларк со 24, Ендрју Лоренс кој имаше 17, како и добро познатиот Кирон Ачара, кој постигна 12 поени.