Со приклучувањето на Шарлон Клоф, Марко Симоновски, Љубомир Младеновски и Адем Мекиќ, екипата на МЗТ Скопје Аеродром првпат тренираше со сите расположиви сили.
На само десетина дена пред отворањето на сезоната и дуелот со Црвена звезда во Белград, актуелниот македонски шампион и тренерот Емил Рајковиќ одржаа тренинг на кој беа присутни сите првотимци на кои се смета за напорната сезона која е пред тимот.
Вчера претпладне во малата сала на спортскиот центар „Јане Сандански“ се појавија играчите кои играа, или требаше да играат за своите репрезентации.
Холанѓанецот Клоф првпат се појави тука, Мекиќ претходно одработе неколку тренинга со клупските соиграчи во периодот кога беше во втор план кај селекторот Драган Раца, а со тренинзи почна и Симоновски, кој имаше непријатна повреда која го спречи да игра во квалификациите.
Откако со „лалињата“ на драматичен начин отпадна од пласман на ЕП 2017, најмногу поради шокантно високиот пораз дома во последното коло од Германија, Клоф имаше солиден репрезентативен период во кој на шесте квалификациски средби беше најпрецизен во својата селекција со просек од 13,2 поени по меч, а имаше и 5,3 скока и 3,2 асистенции.
Стручниот штаб на МЗТ нема премногу време за воигрување и запознавање со системот на новиот стратег, со оглед на тоа што веќе в четврток се игра полуфиналето од Суперкупот на Македонија против Фени индустри.
„Металците“ изминатиов викенд настапија на силниот меморијален турнир „Мирза Делибашиќ“ во Сараево на кој загубија од Будуќност, а ја совладаа Босна Ројал. Ѓорѓе Дреновац доби место во најдобрата петорка на турнирот.