Репрезентацијата на Македонија за кошаркари до 18 години со вчерашниот пораз од Исланд ги загуби шансите да се бори за деветтото место и сега максимум за тимот на селекторот Мирза Куртовиќ е 13. позиција на Европското првенство Б дивизија кое се игра во Софија.
Синоќа по неполни три минути игра резултатот беше 11-1, од тие 11 поени на противникот кои седум беа дело на расположениот 16-годишен Кари Јонсон. Исланд водеше и со 25-9 по осум ипол одиграни минути со што се насетуваше победникот. Истите плус 16, Исланѓаните ги имаа и во 12 минута (30-14). Тогаш Македонија заигра одлично и благодарение на тандемот Маслинко-Бакоч направивме серија од 11-0 за намалување на 25-30 во средината на вториот квартал. Сепак, еуфоријата брзо беше смирена од јуниорите од најсеверниот европски остров кои со серија 14-3 ја вратија убедливата разлика.
Потоа во второто полувреме Исланд не беше сериозно загрозен и рутински ја доврши работата, нанесувајќи им тежок пораз на македонските јуниори кои имаа дури 26 загубени топки и само 52 отсто реализација на слободните.
Денеска во 15 часот против Австрија во меч кој не е со големо значење. Со победа, би се искачиле едно место погоре во групата Х и би играле со нешто послаб противник во следната фаза в сабота. Потоа следува слободен ден, а в сабота и недела е разигрувањето за 13-16 место.